លោកអៀម រតនា ប្រធាននាយកដ្ឋាន អធិការកិច្ច កិច្ចការនគរបាល ថ្នាក់កណ្ដាល ត្រូវបានម្ចាស់ដី ទំលាយរឿងស៊ីដាច់លុយ ៦០ម៉ឺនដុល្លារ

 

ភ្នំពេញ÷លោកអៀម រតនា ប្រធាននាយកដ្ឋានអធិការ កិច្ចកិច្ចការនគរបាលថ្នាក់កណ្ដាល នៃអធិការដ្ឋាន ត្រូវគេចោទថាបានស៊ីដាច់លុយ ៦០ម៉ឺនដុល្លារពីម្ចាស់ដី ខណៈដែលបណ្ដាញសារព័ត៍មាន បានសូមការបំភ្លឺ លើកដំបូងនៅថ្ងៃទី១៩ ខែកក្តដា ឆ្នាំ២០២៥ លោកអៀម រតនា បានឆ្លើយបំភ្លឺថា លោកនឹងបំភ្លឺជូនដោយភ្ជាប់ជាមួយឯកសារពាក់ព័ន្ធ។ ប៉ុន្តែរហូតមកដល់ពេលនេះលោកមិនទទួលទូរសព្ទដើម្បីឆ្លើយតបជាមួយអ្នកសារព័ត៍មាននោះឡើយ។ បើយោងតាមលិខិតចុះថ្ងៃទី១៤ កក្កដា ឆ្នាំ២០២៥ ដែលគេហទំព័រយើងខ្ញុំទទួលបានឲ្យដឹងថា លោកផ្កាយ២ លោក អៀម រតនា ប្រធាននាយកដ្ឋានអធិការកិច្ចកិច្ចការនគរបាលថ្នាក់កណ្ដាល នៃអធិការដ្ឋាន ស៊ីដាច់លុយ ៦០ម៉ឺនដុល្លារ ពីម្ចាស់ដី។

នៅក្នុងលិខិតដដែលនេះបានឱ្យដឹងថា ករណីនេះដែរគឺផ្តើមចេញពីការទិញលក់ដី ជាមួយក្រុមហ៊ុន ហ្រ្គេន ប្រដាក់សិន ឯ.ក ដែលមានទីតាំងស្ថិតនៅភូមិត្រពាំងស្ទង ឃុំស្នំក្រពើ ស្រុកគងពិសី ខេត្តកំពង់ស្ពឺ នៅអំឡុងខែតុលា ឆ្នាំ២០២១។យោងតាមលិខិតមួយរបស់ជនរងគ្រោះបានឲ្យដឹងថា អំឡុងឆ្នាំ ២០២១ ខ្ញុំបាទម្ចាស់ដីបានព្រមព្រៀងទិញលក់ដីជាមួយក្រុមហ៊ុន ហ្គេន ប្រដាក់សិន ឯ.ក មានទីតាំងត្រង ចំណុចភូមិត្រពាំងស្នង ឃុំស្នំក្រពើ ស្រុកគងពីសី ខេត្តកំពង់ស្ពឺ ឱ្យទៅក្រុមហ៊ុន ក្នុងតម្លៃចរចាដោយប្រគល់ប្រាក់ជា ច្រើនដំណាក់កាលតាមព្រមព្រៀង។ ខ្ញុំបាទ និងអ្នកតំណាងឱ្យក្រុមហ៊ុន បានព្រមព្រៀងគ្នាប្រគល់ទទួល ប្រាក់ថ្លៃទិញលក់ដីខាងលើស្ទើតែគ្រប់ចំនួនអស់ហើយ លើកលែងតែដំណាក់កាលទី៤ ប៉ុណ្ណោះ មិនទាន់បានប្រគល់មក ឱ្យខ្ញុំបាទចំនួន USD ៦០០ ០០០ (ហុកសិបម៉ឺនដុល្លាអាមេរិក) ពីព្រោះថា កាលពីថ្ងៃទី០៥ ខែកក្កដា ឆ្នាំ២០២២ ឈ្មោះ អៀម រតនា ភេទប្រុស អ្នកទទួលប្រាក់ចំនួន USD ៦០០ ០០០ (ហុកសិបម៉ឺនដុល្លាអាមេរិក)ពីក្រុមហ៊ុនគ្រប់គ្រង តែម្នាក់ ឯងពុំព្រមប្រគល់ប្រាក់មកឱ្យខ្ញុំបាទឡើយ។

 ទោះបីខ្ញុំបាទទាមទារជាច្រើន លើកច្រើនសារក៏ឈ្មោះ អៀម រតនា មិន ព្រមប្រគល់ប្រាក់មកដែរ។បន្ទាប់មកនៅថ្ងៃទី២៥ ខែមិថុនា ឆ្នាំ២០២៤ ដោយអស់លទ្ធភាពទាមទារប្រាក់ខាងលើ ខ្ញុំបាទដាក់បណ្ដឹងមក កាន់ អយ្យការអមសាលាដំបូងខេត្តកំពង់ស្ពឺ ដើម្បីទាមទារប្រាក់ថ្លៃទិញលក់ពីឈ្មោះ អៀម រតនា ហើយអយ្យការអមសាលា ដំបូងខេត្តកំពង់ស្ពឺ បានសម្រេចចេញដីកាសន្និដ្ឋានបញ្ជូនរឿងស៊ើបសួរដោយធ្វើការ ចោទប្រកាន់លើឈ្មោះ អៀម រតនា ភេទប្រុសពីបទរំលោភលើទំនុបចិត្តតាមបញ្ញាត្តិមាត្រា៣៩១ និងមាត្រា៣៩២ នៃក្រមព្រហ្មទណ្ឌ ក្នុងសំណុំរឿងព្រហ្ម ទណ្ឌលេខៈ ៨៩០ ចុះថ្ងៃទី២៥ ខែមិថុនា ឆ្នាំ២០២៤ របស់សាលាដំបូងខេត្តកំពង់ស្ពឺ។ ហើយតុលាការកំពុងចំណាត់ការ តាមនីតិវិធីច្បាប់ជាធរមាន។ 

ក្រោយនៅថ្ងៃទី៣ខែមករា ឆ្នាំ២០២៥ ខ្ញុំបាទដាក់ពាក្យបណ្តឹងអន្តរាគមន៍ទៅកាន់ឯកឧត្តមអភិសន្តិបណ្ឌិត រដ្ឋម ន្ត្រីក្រសួងមហាផ្ទៃ ដើម្បីមានចំណាត់ការតាមផ្លូវតាមច្បាប់ចំពោះឈ្មោះ អៀម រតនា ដែលមានតួនាទីជាប្រធាននាយកដ្ឋានអធិការកិច្ច កិច្ចការនគរបាលថ្នាក់កណ្តាល នៃក្រសួងមហាផ្ទៃ។ បច្ចុប្បន្នក្រសួងកំពុងចាត់ការតាមនីតិវិធី។ម្ចាស់ដីដែលអះអាងថាខ្លួនជាជនរងគ្រោះបានបញ្ជាក់ប្រាប់សារព័ត៌មានឲ្យដឹងបន្ថែមថា បន្ទាប់ពីលោក អៀម រតនា ស៊ីដាច់លុយ៦០មុឺនដុល្លារ ខ្លួនក៏បានទៅដាក់បណ្តឹងទៅកាន់តុលាការ ខេត្តកំពង់ស្ពឺដើម្បីចាត់ការតាមផ្លូវច្បាប់។ តំណាងអយ្យការអមសាលាដំបូងខេត្តកំពង់ស្ពឺ ក៏បានបើកការស៊ើបសួរ ហើយក៏បានសម្រេចចោទប្រកាន់ លោក អៀម រតនា ពីបទ៖ រំលោភលើទំនុកចិត្ត ដែលមានចែងឲ្យផ្តន្ទាទោសតាមមាត្រា ៣៩១ និងមាត្រា ៣៩២ នៃក្រមព្រហ្មទណ្ឌ។ 

ជនរងគ្រោះអះអាងថាខ្លួនរងភាពអយុត្តិធម៌ជាទីបំផុត ខណៈតំណាងអយ្យការសម្រេចចោទពីបទរំលោភលើទំនុកចិត្តមែនពិត ប៉ុន្តែលោក អៀម រតនា ដែលជាជនស៊ីដាច់លុយ ៦០មុឺនដុល្លារ នៅតែបន្តដើរហើរដោយ សេរី ថែមទាំងមាន តំណែងធំក្នុងក្របខណ្ឌ័ក្រសួង មហាផ្ទៃនោះទៀតផង។ជុំវិញករណីខាងលើនេះ ជនរងគ្រោះ បានសំណូម ពរដល់លោកឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ស សុខា សូមមេត្តាជួយអន្តរាគមន៍រកភាពយុត្តិធម៌ជូន គាត់ដែលជាជនរងគ្រោះផង។ ទោះបីជាយ៉ាងណា ជុំវិញករណីខាងលើនេះ បណ្ដាញសារព័ត៌មានយើងខ្ញុំ និងរង់ចាំការបកស្រាយបំភ្លឺលំអិត ពីលោកឧត្ដមសេនីយ៍ទោ អៀម រតនា គ្រប់ ពេលវេលា២៤ម៉ោងលើ២៤ម៉ោង៕