សាលាដំបូងរាជធានីភ្នំពេញ សម្រេចឱ្យ ម្ចាស់សាលាសុវណ្ណភូមិ ឧកញ៉ា ជា ធីឡាយ សងប្រាក់ចំនួន១០ម៉ឺនដុល្លារ ថ្លៃព្យាបាលភ្នែកក្មេងរងរបួស

រាជធានីភ្នំពេញ៖ ក្រោយវិវាទរវាងសាលារៀនសុវណ្ណភូមិ ជាមួយអាណាព្យាបាលសិស្ស ជុំវិញការធ្វេសប្រហែសរបស់គ្រូបង្រៀន បណ្ដាលឱ្យក្មេងប្រុសម្នាក់រងរបួសភ្នែកធ្ងន់ធ្ងរ កំលុងពេលសិក្សា ដែលបានអូសបន្លាយរយៈពេលជាង៩ខែមកនោះ ពេលនេះ តុលាការក្រុងភ្នំពេញសម្រេចឱ្យឧកញ៉ា ជា ធីឡាយ ម្ចាស់សាលាសុវណ្ណភូមិ សងសំណងប្រាក់១០ម៉ឺនដុល្លារ សម្រាប់ព្យាបាលក្មេងរងរបួសភ្នែក រួមទាំងថ្លៃជំងឺចិត្តផងដែរ...។

តាមរយៈសាលក្រមចៅក្រមជំនុំជម្រះ លោកស្រី ឈុន ដាវី ចុះថ្ងៃទី០៣ ខែកក្កដា ឆ្នាំ២០២៥ បានបង្គាបឱ្យចុងចម្លើយ ឧកញ៉ា ជា ធីឡាយ ម្ចាស់សាលាសុវណ្ណភូមិ បង់សំណងខូចខាត និងជំងឺចិត្តសរុបចំនួន១០ម៉ឺនដុល្លារអាម៉េរិក ឱ្យទៅដើមចោទ លោកស្រី សន កញ្ញា ជាអាណាព្យាបាលកុមារា ញុឹប ចេស្ដា។ ក្រោយរកឃើញថា កាលពីថ្ងៃកើតហេតុខាងលើ ក្មេងប្រុសឈ្មោះ ញុឹប ចេស្ដា របួសភ្នែក ដោយសារខ្មៅដៃ គឺបង្កឡើងដោយកុមារាម្នាក់ទៀត រៀននៅសាលាសុវណ្ណភូមិ សាខាចម្ការដូងទី១។ ភ្លាមៗ..គ្រូបន្ទុកថ្នាក់ទាំងពីរនាក់ ពុំបានយកកុមារឈ្មោះ ញ៉ុប ចេស្ដា ទៅបន្ទប់សង្គ្រោះបឋមទេ បែរជានាំយកកុមាររងគ្រោះចេញមកខាងមុខសាលា រង់ចាំអាណាព្យាបាលមកទទួលទៅវិញ ទើបបណ្ដាលឱ្យស្ថានភាពរបួសកាន់តែធ្ងន់ធ្ងរ។

ជាមួយគ្នា លោកស្រី សន កញ្ញា បានថ្លែងប្រាប់បណ្តាញសារព័ត៌មាន តាមប្រព័ន្ធសារអេឡិចត្រូនិក នៅថ្ងៃទី២៧ ខែសីហា ឆ្នាំ២០២៥ នេះថា លោកស្រីបានអត់ធ្មត់រកដំណោះស្រាយតាមនីតិវិធី ទ្វេភាគី ត្រីភាគី និងនៅតុលាការដោយប្រើពេលវេលារហូតជិត១ឆ្នាំហើយ តែនៅតែមិនឃើញ លោក ជា ធីឡាយ ចេញមុខមកដោះស្រាយទោះមានសាលក្រមនេះក្ដី។ លោកស្រីបានជម្នះការលំបាកជាច្រើនទាំងការសង្គ្រោះកូន តាំងពីពេលកើតហេតុ ការពិនិត្យព្យាបាលជាបន្តបន្ទាប់ និងការគ្រប់គ្រងថែរក្សានាពេលបច្ចុប្បន្នរហូតទៅមុខ។ បន្ថែមលើនេះ លោកស្រី សង្ឃឹមថាឧកញ៉ា ជា ធីឡាយ នឹងទទួលយកទៅអនុវត្តដោយស្ម័គ្រចិត្តចៀសវាងបន្តអូនបន្លាយកាន់តែយូរសក្តិសមនឹងកិត្តិយស សេចក្ដីថ្លៃថ្នូររបស់លោក៕