ភ្នំពេញ÷ត្រីសាលម៉ុន ជាង ៤តោន គ្រឿងក្នុងមាន់ជាង ២តោនរួមជាមួយផលិតផលខូចគុណភាពមួយចំនួនទៀតត្រូវបានរកឃើញ និង កំទេចចោល នៅខេត្តកំពុងធំកាលពីប៉ុន្មានថ្ងៃថ្មីៗនេះ។នេះបើតាមការផ្សាយរបស់អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និង បង្ក្រាបការក្លែងបន្លំ ហៅកាត់ ថា ក.ប.ក នៅលើទំព័រហ្វេសប៊ុករបស់ខ្លួន។
ក្រោមការដឹកនាំ និងសម្របសម្រួលដោយលោក សាយ វាសនា ព្រះរាជអាជ្ញារងខេត្តកំពង់ធំ នាថ្ងៃទី២០ ខែសីហា ឆ្នាំ២០២៥ នេះ មន្ត្រីសាខា ក.ប.ប. ខេត្តកំពង់ធំ សហការជាមួយ មន្ត្រីនៃមន្ទីរពាណិជ្ជកម្មខេត្តកំពង់ធំ មន្ត្រីនៃរដ្ឋបាលជលផលខេត្តកំពង់ធំ និងនគរបាលប្រឆាំងបទស្មើសសេដ្ឋកិច្ចខេត្តកំពង់ធំ បានចុះត្រួតពិនិត្យទំនិញដែលមានហានិភ័យដែលបានដឹកតាមរថយន្តក្រុង១គ្រឿង មានដូចជា ត្រីសាលម៉ុន ចំនួន ១៤០កេស ស្មើនឹង ៣០១០គីឡូក្រាម គឿងក្នុងសត្វមាន់ ចំនួន ២១០កេស ស្មើនឹង ២៥២០គីឡូក្រាម ទឹកស៊ីអ៊ីវចំនួន ១០០ប៊ីដុង ស្មើនឹង ៤០០លីត្រ វ៉ាសាប៊ិ ចំនួន ២កេស ស្មើនឹង ១០០គីឡូក្រាម សរុបចំនួន ៥,៦៣០គីឡូក្រាម និង ៤០០លីត្រ ។
ជាលទ្ធផល ក្រោយពីមន្ត្រីជំនាញធ្វើការត្រួតពិនិត្យបានរកឃើញថាទំនិញទាំងអស់បានខូចគុណភាព ដោយសារការដឹកជញ្ជូន និងការរក្សាទុក ពុំត្រឹមត្រូវតាមលក្ខខណ្ឌតម្រូវផ្នែកបច្ចេកទេស។ ហេតុនេះព្រះរាជអាជ្ញារងក៏បានអនុញ្ញាតឱ្យរឹបអូសដើម្បីធ្វើការកម្ទេចចោលទៅតាមនីតិវិធី” ៕
No comments:
Post a Comment