នគរបាលយើង បានប្រើវិធានការ បង្ការ និងទប់ស្កាត់ ចំគោលដៅបានយ៉ាងល្អប្រសើរ ទើបការបង្ក្រាបមានការថយចុះគួរឱ្យកត់សម្គាល់

 

កំពង់ចាម÷ប្រសាសន៍លោកឧត្តមសេនីយ៍ទោ ហេង វុទ្ធី ស្នងការនគរបាលខេត្តកំពង់ចាម បានលើកឡើងក្នុងកិច្ចប្រជុំ បូកសរុបសភាពការណ៍ លទ្ធផលកិច្ចប្រតិបត្តិការរក្សាសន្តិសុខសង្គម ការងារនគរបាលសហគមន៍ប្រចាំខែវិច្ឆិកា ឆ្នាំ២០២៥ និងលើកទិសដៅអនុវត្តបន្ដ នាព្រឹកថ្ងៃព្រហស្បតិ៍ ទី២០ ខែវិច្ឆិកា ឆ្នាំ២០២៥ នៅសាលប្រជុំធំ នៃស្នងការដ្ឋាននគរបាលខេត្តកំពង់ចាម ដែលបានអនុវត្តតាមអនុសាសន៍ដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម អ៊ុន ចាន់ដា អភិបាល នៃគណៈអភិបាលខេត្តកំពង់ចាម ។

ក្នុងឱកាសនៃការបូកសរុបលទ្ធផលការងារប្រចាំខែនេះ លោកឧត្តមសេនីយ៍ទោ ហេង វុទ្ធី បានលើកយកបទពិសោធន៍ដែលអនុវត្តបាន មកឆ្លុះបញ្ចាំងពីសកម្មភាពរបស់ថ្នាក់ដឹកនាំគ្រប់ផែនជំនាញ រហូតដល់ថ្នាក់មូលដ្ឋាន បានខិតខំបំពេញតួនាទី ភារកិច្ច ប្រកបដោយគុណភាព និងប្រសិទ្ធភាព ។លោកឧត្តមសេនីយ៍ស្នងការ បានបន្ដទៀតថា វិធានការដែលមានប្រសិទ្ធភាពខ្ពស់បំផុត គឺជាវិធានការ បង្ការ និងទប់ស្កាត់ មុនបទល្មើសកើតឡើង ទើបធ្វើឱ្យវិធានការបង្ក្រាប មានការថយចុះ គួរឱ្យកត់សម្គាល់ ។

ទន្ទឹមនឹងនេះ កងកម្លាំងគ្រប់រូប ត្រូវបន្ដពង្រឹង និងបង្កើនសមត្ថភាពឱ្យបានតែខ្លាំងក្លា បន្ថែមទៀត ដើម្បីធានាបាននូវការគ្រប់គ្រងសភាពការណ៍ សន្តិសុខ រក្សាសុវត្ថិភាព សណ្ដាប់ធ្នាប់ សាធារណៈ ជូនប្រជាពលរដ្ឋ ក្នុងភូមិសាស្ត្រខេត្តកំពង់ចាមទាំងមូល ។ ដោយកិច្ចប្រជុំនេះ មានការអញ្ជើញចូលរួមពី លោក លោកស្រី ស្នងការរង លោកអនុប្រធានផែន លោកនាយការិយាល័យជំនាញ លោកអធិការ-អធិការរងនគរបាល ក្រុង-ស្រុក ទាំង១០ និងលោកនាយប៉ុស្តិ៍នគរបាល ទាំង១០៩ ៕