ក្រោយពេល ពិធីបុណ្យសព របស់លោក​ឧសក ស្រេង​ រ៉ា ត្រូវបានបញ្ចប់តាមបែបប្រពៃណី ព្រះពុទ្ធសាសនា លោកប៊ិន ឡាដា បានចុះមូលដ្ឋាន ដើម្បីសួរសុខទុក្ខ ដល់កងកម្លាំងទាំង៣ ជាពិសេស ប្រជាពលរដ្ឋ នៅក្នុងស្រុកស្រីសន្ធរ

 

កំពង់ចាម÷ក្រោយពេល ពិធីបុណ្យសព លោកឧបាសក ស្រេង រ៉ា ត្រូវជាលោកឪពុកក្មេក របស់លោក ប៊ិន ឡាដា អភិបាល នៃគណៈអភិបាលស្រុកស្រីសន្ធរ ត្រូវបានបញ្ចប់ តាមបែបប្រពៃណីព្រះពុទ្ធសាសនា កាលពីថ្ងៃទី១០-០៨-២០២៥  ។ ខណះនេះលោកប៊ិន ឡាដា បានចុះជួបសំណេះសំណាល ជាមួយកងកម្លាំងប្រដាប់អាវុធ និងសួរសុខទុក្ខប្រជាពលរដ្ឋ នៅក្នុងមូលដ្ឋានស្រុកស្រីសន្ធរ ជាបន្តបន្ទាប់។

ជាក់ស្តែង នៅវេលាព្រឹកថ្ងៃសុក្រ ៦រោច ខែស្រាពណ៍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១៥ ខែសីហា ឆ្នាំ២០២៥ លោក ប៊ិន ឡាដា អភិបាល នៃគណៈអភិបាលស្រុក និងជាប្រធានគណៈបញ្ជាការឯកភាពរដ្ឋបាលស្រុក បានដឹកនាំក្រុមការងារស្រុក ចុះជួបសំណេះសំណាល សួរសុខទុក្ខ និងនាំយកអំណោយសម្ភារ ដូចជាគ្រឿងឧបភោគ បរិភោគ ជូនគ្រួសារភៀសសឹកចំនួន១៣គ្រួសារ នៅក្នុងមូលដ្ឋានឃុំព្រែកដំបូក ស្រុកស្រីសន្ធរ។

ដោយឡែក នៅល្ងាចថ្ងៃទី១៤ ខែសីហា ឆ្នាំ២០២៥ លោក ប៊ិន ឡាដា អភិបាល នៃគណៈអភិបាលស្រុក បានដឹកនាំក្រុមការងារស្រុក កងកម្លាំងទាំង៣ និងឃុំព្រែកដំបូក ព្រមទាំងវត្តមានព្រះអនុគណស្រុកស្រីសន្ធរ ចុះពិនិត្យមើលវឌ្ឍនភាពនៃការសាងសង់ចេតិយ (សាង់សង់បាន៨០%) ដែលជាអំណោយដ៏ថ្លៃថ្លារបស់ឯកឧត្តម អ៊ុន ចាន់ដា អភិបាល នៃគណ:អភិបាលខេត្តកំពង់ចាម និងឯកឧត្តម លូ គឹមឈន់ ប្រធានក្រុមការងាររាជរដ្ឋាភិបាលចុះមូលដ្ឋានស្រុកស្រីសន្ធរ សម្រាប់តម្កល់ឥដ្ឋធាតុរបស់វរយុទ្ធជន អនុសេនីយ៍ឯក ហេង តាំង ដែលបានពលីក្នុងសមរភូមិព្រះវិហារ (តាថាវ) ក្នុងការពារបូរណភាពដែនដី ប្រឆាំំងសត្រូវឈ្លានពាន។

និងនៅរសៀលថ្ងៃទី១៤ ខែសីហា ឆ្នាំ២០២៥ លោក ប៊ិន ឡាដា អភិបាល នៃគណៈអភិបាលស្រុក និងជាប្រធានគណៈបញ្ជាការឯកភាពរដ្ឋបាលស្រុក បានដឹកនាំក្រុមការងារស្រុក កងកម្លាំងទាំង៣ និងរដ្ឋបាលឃុំកោះអណ្តែត ចុះពិនិត្យមើលទីតាំងបាក់ច្រាំងទន្លេ ក្នុងភូមិសាស្រ្តឃុំកោះអណ្តែត។ រសៀល ថ្ងៃទី១៤ ខែសីហា ឆ្នាំ២០២៥ លោក ប៊ិន ឡាដា អភិបាល នៃគណៈអភិបាលស្រុក និងជាប្រធានគណៈបញ្ជាការឯកភាពរដ្ឋបាលស្រុក បានដឹកនាំក្រុមការងារស្រុក និងកងកម្លាំងទាំង៣ ចុះជួបសំណេះសំណាល សួរសុខទុក្ខ និងនាំយកអំណោយសម្ភារ ដូចជាគ្រឿងឧបភោគ បរិភោគ ព្រមទាំងថវិកាជូនគ្រួសារកងទ័ព ជនភៀសសឹក និងពលករដែលត្រលប់មកពីថៃ និងមានជីវភាពក្រីក្រ សរុបចំនួន១០គ្រួសារ នៅក្នុងឃុំកោះអណ្តែត ស្រុកស្រីសន្ធរ។

សូមជម្រាបបន្ថែមថា នៅថ្ងៃសុក្រ ទី១៥ ខែសីហា ឆ្នាំ២០២៥ លោក ប៊ិន ឡាដា អភិបាល នៃគណៈអភិបាលស្រុកស្រីសន្ធរ បានដឹកនាំក្រុមការងារស្រុក កងកម្លាំងទាំង៣ និងរដ្ឋបាលឃុំព្រែកដំបូក ចុះសាកសួរសុខទុក្ខគ្រួសារក្រីក្រ ចំនួន១គ្រួសារ សមាជិកសរុបចំនួន៧នាក់ ស្រី៣នាក់ រស់នៅភូមិព្រែកដំបូកក្រោម ឃុំព្រែកដំបូក ស្រុកស្រីសន្ធរ និងបានឧបត្ថម្ភសង្កសីចំនួន៣០សន្លឹក ដើម្បីប្រក់ដំបូលផ្ទះ ព្រមទាំងផ្តល់ជូនអំណោយរួមមានៈ អង្ករ៥០គក មី១កេស ទឹកត្រី១យួរ ទឹកស៊ីអ៊ីវ១យួរ និងថវិកាចំនួន៥០ម៉ឺនរៀល (ផ្នែកសឹករងស្រុកចូលរួមចំនួន១០ម៉ឺនរៀល)។ មហាជន នៅក្នុងស្រុកស្រីសន្ធរ ខេត្តកំពង់ចាម បានសំដែងការសាទរ និងសូមថ្លែងអំណរអរគុណយ៉ាងជ្រាលជ្រៅ ចំពោះលោកប៊ិន ឡាដា អភិបាលនៃគណ:អភិបាលស្រុកស្រីសន្ធរ  ដែលតែងតែង គិតគូរដល់កងកម្លាំងប្រដាប់អាវុធ ជាពិសេស ទុក្ខលំបាករបស់ប្រជាពលរដ្ឋនៅក្នុងមូលដ្ឋាន។